People, Blood like he pun a roll dis season – everywhere dis mongoose go, de crowds responding to he! He get a big roar from de crowd from as-as he step out pun de stage hey at Kensington to perform Not My Son.
And he performance live up to de crowd hype – he put down a ripping performance of de song – come out wid all guns blazin’! Yuh could hear de passion in he voice as he sing de way nuff parents does reason when dem children land in trouble – dat it could neva be dem chile mekkin’ people snort. He get an even bigger set of applause when he did done.
Dat was a hard act to follow but de youngster Sheldon Hope do a pretty good job wid he song Hope. De song ent necessarily de kinda sharp, jabbin’ song dat does got de crowd jumpin’ up and hollerin’ hard but he voice sweet-sweet and he sing it beautifully – hold a long, pretty note right at de end – wuhloss! De boy could sing in trute!
Recent Comments