Wuhlossssssssssssssssss x 2!

I say it in de firs’ half and I gots to say it again in de second half.

Bag mash up de place.

If wunnuh feel people did singing along hard to he first song Home Drums, well it was de Kensington Oval Choir fuh de second song, he big hit ‘Something’s Happening’.

He start wid a nice lil intro wid dancers in Kadooment costumes and two ‘tourisses’ trying to figure out what gine on and then he burst on to de stage.

People LOVE dis song – listen to dis mongoose. I even try snapping a few pictures wid muh mongoose-cam to get a shot of de crowd reaction fuh wunnuh. Iffin de batteries hol’ up, I gine upload dem and leh wunnuh see.

Is de ‘oyoyoy’ part in de song dat does get de crowd – remembuh I tell wunnuh people like to be able to sing along wid a song and dat part where Bag does go ‘Oyoyoy… somet’ing’s happening!’ had de crowd going good.

Kensington was a sea of red just now – red plastic bag, red umbrella, red kerchief – everyt’ing red people had dem in de air fuh RPB.