Talkin’ bout judges, we got trouble again wid de Party Monarch.
De judges leff out de people dat does got de radio hot all day and night, like Stabby, Sickie, Pong and Contone.
An’ one more time, de ones dat get leff out holdin’ a big fete de same time as de Party Monarch show.
Look, I en nuh expert; I is jus’ a mongoose. It seem to me, doh, dat if dis ting happenin’ all de time something got to be wrong.
Lookuh, on one han’ people dat popular gettin’ lef’ out, causin’ duh don’ meet de criteria. Nuh problem wid dat. But on de ethuh han’, people like Serenader, Adrian Clarke an’ Smokey Burke, who got good lyrics and sweet melody, gettin’ lef’ out too.
Someting wrong!
I en know wuh de judges lookin’ fuh but duh got my li’l mongoose brain cafuffle, I tell yuh!