How wunnuh doing?
De Crop Mongoose on spot, reporting fuh duty. I did dun know dat don’ min’ Peter Boyce sayin’ dat everything did cool wid Crop-Over, duh had to be some kinda commotion somewhere, sometime.
Look, dem calypsonians so touchous dat yuh could always expec’ dat someting gine flare up any time. An’ dat is why I feel de NCF shoulda know better dan to put de tribute to Plastic Bag any time before de calypso competition.
Dem did dealin’ wid calypsonians all dese years and don’ know yet dat it don’ tek nutten fuh a calypsonian
to see a problem? Lookuh, duh en got nuhbody in duh right min’ dat would oppose Bag gettin’ a award fuh calypso. An’ duh got a time an’ place fuh dat. It name de Crop-Over awards ceremony, when all de winners does get duh prizes. I woulda t’ought dat would be de obvious time to do it.
Yuh don’ gi’ calypsonians nuh opportunity at all to complain, otherwise duh gine complain. I is jus’ a mongoose an’ I know dat. De NCF should know it, too.
An’ de responses comin’ from de NCF ackin’ CEO don’ help neiduh. Instead o’ accepin’ dat duh choose de wrong time, de language he use soun’ like he did lookin’ fuh a fight wid somebody.
He say de talk bout de tribute did “a nonsensical debate” an’ it din “worth pursuing”. He could tell people wuh to talk ’bout? People express duh feelings, as duh had a right to. He really feel he could tell calypsonians in particklar dat duh should keep quiet? If he keep on gine down dah road he gine soon be a nex’ nedduh West Terrace casualty, hear?
A word to de wise . . . An Mr Browne should tek note uh de fac’ dat not a single body dat disagree wid de NCF timing had anyting bad to say bout Bag. Ev’ry single one show de man from de Eas’ nuff respeck, as he deserve.
One more ting on dis topic, doh. Bag is a boss. Wunnuh see he letter to de NCF? I know he used to play some youth cricket, but de kinda shots he play in dah letter, he should be playin’ fuh de West Indies. Hear Bag: “Further, it is a sad indictment against the integrity of the Pic-o-De-Crop judges which the calypso tents helped to select.”
Shot! Iffin’ dah was cricket fuh true, Billy Bowden would be puttin’ up dah hook finger. Six runs! In case some o’ wunnuh don’ onstan’, wuh de man do is put heself firmly on de side o’ de judges, in public too.
In ethuh words, he tellin de judges: “I en got nuh problems wid wunna, even if some ethuh people might
seem to.”
Look, Crop-Over too sweet, hear?
