So peoples, dis is it. I did enjoy talkin’ wid wunnuh an’ I hope wunnuh did feel de same way bout me. It was good talking wid all muh fans pun de world wide web, ’specially pun Finals night - wunnuh had in hey hot enough! Wunnuh tink I easy? Iffin God spare life an’ nuttin don’ change, I gine hear wunnuh nex’ year. De ’Goose gone!

Wunna could believe that time coulda fly so fas’, doh?

Lookuh, it feel like yesterday dat I start talkin’ wid wunnah.

As my dear old mongoose mudda used to say, doh, everyting good does come to a en’.

Lemme end off by congratulatin’ all de winners – Khiomal, AC, De General Edwin, Betty West an’ Gwyneth Squires. It did good to see Edwin back in de thick o’ tings an’ I hear he sayin’ pun de radia dat he lookin’ forward to tekkin part in de Pic-O-De-Crop monarchy again. 

Looka trouble! Dah man don’ come easy, hear? All like now people gine back to drawin’ board wid songs dat did dun write a’ready, yuh could bet!

One o’ de people I really happy fuh dis Crop-Over is Natahlee. She come in high in Party Monarch an’ Tune O’ De Crop and big-up fuh dat. Wuh really impress me is dat she write de song sheself. Lissen, outside o’ Jamaica nuhbody don’ sit dung pun a riddim like Nat-Nat, hear?

I suspec’ she din suh confident in she writing skills but I hope she know now dat she could do it. 

Well done, girl. 

An lissen, tell yuh frien’ TC dat yuh got to look a certain way to unbutton yuh shirt in front nuff people. She do it at Soca On De Hill den again at Cohobblopot.

Is true dat Shadow back he shirt an’ show he belly at de Hill but nuhbody en care bout dat. He is Shadow an’ he could do anyting.

As Chris Rock say, when yuh is 20, yuh titties is community titties yuh could share wid everybody, but when yuh reach a certain age, yuh titties is fuh private showing only. 

Get a grip, girl!

But dere’s a ting wid Peter Boyce and de MADDmen, doh. Heh, hey! After all o’ dese years too. De fellas feel real hurted, too. When I see PC Broomes pun TV talkin’ bout why duh split up, I could see de hurt in he face. An’ Peter look like iffin’ he age a lot dese pas’ few weeks. I tell yuh, life funny.

Wuh hit me too is dat while Cohobblopot did ram off, I hear yuh coulda run bout 100 rats tru de Gymnasium fuh Boyce an’ dem show, Euphoria.

I hope Boyce tek some time out to do some hard tinkin. When it come to promotion yuh can’ touch he, so yuh could expec’ he to come back wid a bang nex’ year. You mark my words. Peter Boyce en nuhbody to lie down an’ play dead!

To me, dis Crop-Over did bout learnin’ lessons. Some people learn an’ some mek it plain dem need to learn. De firs’ lesson dat get learn is dat yuh shouldn’ over-price yuhself an dat yuh should wake up an’ tek a real look at de market. People talk bout hummuch Machel get pay but yuh could see wuh he bring to de table. 

Even so, doh, tell de trut’, I feel dat $60 000 is nuff to pay fuh one ack in a festival. Ting, I feel dat when yuh could pay summuch money to one man, superstar dat he is, yuh could sweeten de pot li’l more fuh local artistes, at leas’ local artistes dat don’ got nuh unrealistic view o’ wuh dem worth.

Lissen, I was so glad to report las’ week how proud I was o’ de Hypa Dawg fuh how he tek he placing at de Party Monarch. I shoulda know better.

Ting, de man get on like he mek heself at Cohobblopot. It look like he feel he got a duty to be a bad boy an’ cah long heself scruffy whenever he see a big crowd. He din’ rehearse fuh de Welcome To Rihanna show an’ went an’ ask people wey he award. He shoulda ask heself wey he Grammy!

Now at Cohobblopot he complain some people get 105 minutes an’ he only get five. He en nuh Machel, much as I like he! But dah en’ de wors’! De man went long an’ say don’ min’ he en win Party Monarch, he is still de “hypest” an’ dat he more popular dan de Prime Minister. I hear he repeat de las’ statement a few times pun Spring Garden Kadooment Day. He clearly en lookin’ fuh nuh work from dis Guvment.

I hope he management, Pyramid Entertainment, sit he down an’ tell he some home truths fas’, fas’, fas’. Dah young woman Santia Bradshaw dat does run Pyramid is a woman wid she head on an’ I feel she should tell Hypa dawg dat duh had entertainers before he an’ duh gine got entertainers after he.

Wunnuh know I like de Dawg, but he movin’ wrong.

Yuh see, I don’ feel Hypa Dawg know who all o’ he fans is. It en jus’ de bashy people, ting. I know women in duh 60s dat don’ leh Hypa Dawg programme miss dem pun a Sarduh. He need to remembuh dat. An’ I dun wid dat.

Well, wunnuh come right down to de wire wid de Crop-Over Mongoose and at de end of de night both de blog judges and de people pun de ground was right - after performance number 9 in de second half, it was done.

Adrian Clarke win de monarchy, adding a second crown to he 2001 Pic-o-de-Crop victory.

Congrats to he - he come up against three other kings and a solid field and he beat dem all. It is a result evahbody happy wid even doh I already hear people hollerin’ out when dey realise was up so high. I ent gine lie, fuh a minute I thought de judges woulda give he a nex crown! Muh mongoose heart cyan tek so much excitement and dat one Mac Fingall din mekkin’ it nuh better, dragging out de announcement long as evah.

Peoples, dat is all from me fuh tonight - or rather, dis morning. I now got to go and scurry way back to de cane fields and get way from all dese people and cars dat gine be floodin’ outta Kensington.

De ‘goose gone!

Alright, i givin’ it to wunnuh as it comin’

10 - Enobong - 336 pts - The Experience.

9 - Romeo - 341 pts - Bacchanal Time

8 - Sheldon Hope - 369 pts - De Big Show

7 - John King - 380.5 pts - De Big Show  - wuhloss, people scream fuh dat one boh!

6 - Mr. Impact - 386.5 pts - Trimart Hit Parade

5 - De Announcer - 394 pts - Cave Shepherd All Stars

4 -Blood - 397.5 pts -  Headliners Calypso Tent

3 - Classic - 402 pts - Bacchanal Time

2 - Red Plastic Bag - 415.5 pts -  De Big Show

1 - ADRIAN CLARKE - 421.5 pts Cave Shepherd All Stars

As Bumba sing back in 87 ‘dey want to know’ - people want to know who de ‘goose got out front.

Fuh sure I got AC to win and I got Classic up in de top 3 too. I can’t really put muh finger (or claw) pun who gine round out dat top 3 to be honest - it could be any one of Bag, Mr. Impact, Blood or John King.

So far de blog judges - yes dat is what I dubbin’ wunnuh fuh de night - got AC out front by a mile - near everybody call he as dey king. Classic in dey too fuh a lot of people and Blood too and of course nuff people got Bag somewhere in de top positions.

But we gine all see in a short while if de judging go long as fast as it went at de semis and de Party Monarch.

Update # 1

Bajan Angel ask a good question - wha de people on de ground saying? Well yuh know de ‘goose would got dat fuh yuh - cos keeping close to de ground is muh specialty! De buzz from de people hey at de Oval is definitely wid AC - he performance of Put That In Yuh Song was de performance of de night - wunnuh hear de whole place singin’ along wid he? Loud too yuh know!

Update #2

Diana just ask what de scene like right now - to tell de truth, ent much to tell. Dey had de kings of de band parading but dat was a good 20 minutes ago now dat dey done. De stage dark like dey just waiting fuh de Pic-o-de-Crop monarch to be announced and dey running some ads on de two big television screens dat pun either side of de stage.

Update #3

Alright peoples- de lights back up and MC Mac Fingall back pun de stage - so dat must mean dat somet’ing bout to happen! He just introduce a young lady name Kellyann Patrick who playing alto sax wid de Festival band - apparently she is de first woman to eva play in de Festival band - big ups to de young girl!

Update #4

Margaret Allman-Goddard just announce de king and queen of de bands - Trevor Chase, de bandleader of Ooutraje come first in de kings category and Katrina Gremell from Refugees wid de costume Madame Butterfly win in de queens category.

Mac now introducing de dignitaries that gine present to de winners. De PM David Thompson in de place - I guess he gine present to de monarch. We ready now!

Kensington Oval mash up! And who do um? Dat one Adrian Clarke wid Put That in Yuh Song! I got to borrow from de Hypa Dawg hey - AC mash up and buy back wid dat song - de Oval now got dat kinda buzz yuh does get when yuh see a masterful performance from a kaisonian at de top of he game. He barely had to move pun de stage - he just pelt lashes left, right and centre - in politicians, in kaisonians in da preacher fella Jippy Doyle dat get convict day before. Man he did shottin’ nuh lie!

And wunnuh commenters both hey and over in away like yuh agree wid de crowd at de Oval - Thunderbaje, Stephen, Diana and Bajan Angel all callin it or leaning toward AC - and Stephen confess he is a Bag man!

Yuh got to feel a bit fuh John King comin’ after a performance like dat - he trying to lift de crowd but dey like dey done get what they want in AC performance. He try he best just now wid Time for Change and he voice did de same nice John King voice as evah but he ent tek it over de top as far as dis mongoose concern.

I know I ent got ask wunnuh wuh yuh t’ink cos de comments rolling in left and right. Couple people questioning whether Bag song was even a calypso and dat is a question I hearing people ask hey at de Oval self as I scurry bout between de seats - people say it sound more pop-ish, boh. Of course, he ent de first one to face dis question - remembuh boh Edwin Yearwood and John King get dem kinda questions back in de nineties - Edwin wid Voice in My Head and John King wid How Many More. 

Well, de real action done now - dey chip along fast enough dis year - is only 11:40 p.m. hey in Bim and dey done get through de 20 performances already. I gine let wunnuh know in a l’il bit who is de king (or queen) of dem all. Stay wid de ‘goose fuh de results!

Wuhloss, De Announcer now jump de whole of Kensington just now wid he presentation fuh de song Silent Screams dat criticising abortion! He had a set of pictures of aborted fetuses dat was gory enough. I wasn’t even looking pun de screen when I hear people holler out. I ent know if it is dat or de fact dat his voice strugglin’ a bit on de high notes but de crowd like dey ent respond to dat song too much - dey was real quiet.

Wuhloss - wunnuh commenting as fast as I could check um! I see de blog got readers all in California, USA and Toronto, Canada - de ‘goose gone international fuh real! All de rest of wunnuh, doh fuhget to tell me which part wunnuh from.

Bag now done singing Power of Democracy - as usual de die-hard Bag fans did up and wavin’ dey red plastic bags down front but dat song din have dat extra ting. He like he definitely do he stronger song in de first half cause dis song wasn’t too familiar, he was struggling to hit de higher notes in de chorus and just fading out and letting de back up singers carry he. Moreover, aside from de die-hard Bag people down in de front, de rest of de crowd din pun duh feet de way duh was in de firs’ half. I ent know boh … but I’s just a mongoose.

Dis like it is Classic best year  to chance at de crown - at least if yuh lookin’ at de response of de crowd when Mac Fingall call out de name. Bare cheers went up from Kensington! He got another hot song in Dey Done See. People like dey respond to it better at de semis but he still get a good roar near de end when he say dat everybody ‘done see’ dat he should win de crown and we gine see if de judges ‘done see’ fuh true. De people down pun de grounds like dat one!

Speaking of de people in de place - it lookin’ like a fair size crowd - I hear dey was estimating fuh about 13 000 + people and dey lookin’ at around 12 000 now so not bad. Wha is bad doh is dat I hear dey had bare confusion at de gates - people din know which gate dey was supposed to go to and dey end up wid some bottlenecks at a few gates. But wunnuh could find out more bout dat in tomorr’ paper - and of course, fuh wunna overseas, evahting gine be on www.nationnews.com/cropover as t’ings done!

Blood now on stage doing Duckworth and Lewis - tell de truth, dis had potential to be a real good song yuh know - it had a clever theme wid de whole comparison of judging requirements to dat Duckworth/Lewis t’ing dat like it always confusin’ tings in cricket. Years now and nuff people still can’t get it figure out - wait, da like de calypso judgin’ in trut’! But like I was sayin’ bout Blood performance, it was like de first half - it just had de feeling of someting missing to tek it over edge - but dat is just my mongoose opinion - click pun de comments link and lemmuh know wha wunnuh t’inking!